Oqaaserpassualeriffik sooq pisariaqarpa?
Ullut tamarluinnaasa oqaaserpassualerinermik suliat naammattoortarpavut atortarlugillu, ass. oqarasuaatini, internetsimi, nutaarsiassani, ordbogini il.il.
Malugiulli atortorissaarutit tamakku sungiusimasavut oqaatsit kalaallisuujunngitsut atorlugit ingerlanneqarajunnerusarmata!
...
Ukiut tamarluinnaasa nunarsuarmi oqaatsit arlalissuit atorneeruttarput. Maanna nunarsuarmi oqaatsit 7000-it missiliorpaat, naatsorsuutigineqarporli ukioq 2100 tikitsinnagu oqaatsit affaasa missaat atorneerutereersimassasut.
Nunarsuarmi oqaatsit imminnut unammilleqatigiissutut ipput! Oqaasilerisut nunanit tamalaaneersut isumaqarput oqaatsinik piuinnartitsinissamut aqqutissaq tassaasoq atortorissaarutitigut pitsaasunik oqaatsinut ikiuutissaqarluarneq.
Oqaatsit atorneqartuartillutik ineriartortuassapput oqaatsinillu atuisut oqaatsiminnut ikiuutissaqarluartillutik oqaatsiminnik ineriartortitsiuassapput.
Kalaallisut oqaatsivut siunissaqartikkumallugit oqaatsinullu allanut naleqqersuussinnaajumallugit pisuni tamani atortariaqarpavut, aamma qarasaasiami!
Kalaallisut oqaatsit qarasaasiami suliaqarnitsinni atorneqarsinnaassappata kalaallisuttaaq oqaaserpassualerineq (qarasaasiaq atorlugu oqaasilerineq) aallutissallugu pingaaruteqarluinnarpoq.
Kalaallisut oqaatsitit atorluartakkit - aamma makkunani!
